რა არის მიოლიზი

მიოლიზი არის მეთოდი, რომლის დროსაც თერმული ენერგიით მიომის შემქმნელი უჯრედები კოლაგენურ სტრუქტურად გარდაიქმნება, ორგანიზმის მიერ შეიწოვება და შედეგად მიომა მცირდება. შემცირებასთან ერთად დროთა განმავლობაში მიომა აღწევს ისეთ ზომას, რომელიც აღარ იწვევს არანაირ დისკომფორტს ან სიმპტომს. მიოლიზის პროცედურა ხორციელდება Cool RF-ით, ანუ ცივი რადიოსიხშირული ელექტროდის მქონე ტრანსვაგინალური სისტემით.

ნემსის წვერიდან მიომის შიგნით ცირკულირებს ცივი მარილიანი ხსნარი. ამავე დროს პროცედურა რეალურ დროში კონტროლდება ულტრაბგერითი აპარატითაც. ნემსის წვერის ტემპერატურის მუდმივი მონიტორინგის შესაძლებლობა ხელს უწყობს უფრო წარმატებული და ზუსტი ოპერაციის ჩატარებას. ეს მეთოდი ამავდროულად ყველაზე მინიმალურად ინვაზიურ მეთოდად ითვლება. ამის წყალობით პაციენტებისთვის როგორც ოპერაციის, ისე მის შემდგომი აღდგენის პერიოდი მოკლე და კომფორტულია.

მიოლიზისთვის გამოყენებული ნემსის წვერის სიგანე შეიძლება შეიცვალოს 0,5-დან 4 სმ-მდე. ეს ქირურგს უფრო ზუსტად მუშაობის საშუალებას აძლევს და ამავე დროს სხვადასხვა ზომის მიომაზე ჩარევის შესაძლებლობას იძლევა. ერთი მიომისთვის გათვალისწინებული აბლაციის საშუალო ხანგრძლივობა 12 წუთია. თუმცა ეს დრო მიომის ზომის მიხედვით შეიძლება შემცირდეს. მიოლიზის პროცედურაზე გადაწყვეტილების მიღებისას დაავადების მდგომარეობა უაღრესად მნიშვნელოვანია. მკურნალობის ტიპის შერჩევისას მხედველობაში მიიღება მიომის ზომა და მისი მდებარეობა. 8 სმ-ზე დიდი მიომების შემთხვევაში მიოლიზი პირველ არჩევანად არ განიხილება.

პროცედურის შემდეგ დაავადების მდგომარეობას ექიმი აკონტროლებს. პროცედურიდან მესამე თვეს, ჩვეულებრივ, იწყება შემცირება. ერთი წლის განმავლობაში კი ნამკურნალებ მიომებში 80-დან 90%-მდე შემცირება აღინიშნება.

მიოლიზი: რა უპირატესობები აქვს ტრანსცერვიკულ რადიოსიხშირულ აბლაციას (TCRFAS)?

მიოლიზს, როგორც ყველაზე მინიმალურად ინვაზიურ მეთოდს, მნიშვნელოვანი უპირატესობები აქვს. იმის წყალობით, რომ პროცედურა ტრანსვაგინალურად ტარდება, არანაირი ჭრილობა არ კეთდება და, ბუნებრივია, ნაწიბური არ რჩება. ასევე, პროცედურა ხანმოკლეა. მეტიც, ერთი ოპერაციის განმავლობაში შესაძლებელია რამდენიმე მიომის აბლაციის ჩატარება. მინიმალურად ინვაზიური მეთოდის წყალობით პაციენტებს იმავე დღეს შეუძლიათ საავადმყოფოს დატოვება. დასვენებისა და ნორმალურ ცხოვრებაში დაბრუნების პერიოდიც საკმაოდ მოკლეა. ამიტომ პაციენტები დიდი დროის დაკარგვის გარეშე უბრუნდებიან ყოველდღიურ თუ სამუშაო ცხოვრებას. მინიმალურად ინვაზიური მეთოდით გვერდითი მოვლენებისა და ოპერაციის შემდგომი გართულებების რისკი მინიმუმამდე მცირდება.

მიოლიზის მეთოდის კიდევ ერთი მნიშვნელოვანი უპირატესობაა ის, რომ პროცედურის დროს პაციენტის საშვილოსნო ნარჩუნდება. ეს კი პროცედურის შემდეგ პაციენტებს დაორსულების საშუალებას აძლევს. ამიტომ მიოლიზი უტარდებათ პაციენტებს, რომლებსაც მომავალში დედობა სურთ. ამასთანავე, ის მარტივად ტარდება იმ პაციენტებშიც, რომლებსაც უკვე აქვთ გადატანილი ოპერაცია, აწუხებთ სიმსუქნე ან შიშის გამო არ სურთ ოპერაცია.

პროცედურის დროს ნემსის წვერის ტემპერატურა 12-დან 20 გრადუსამდე მერყეობს. მეტიც, ეს ტემპერატურა ოპერაციის მანძილზე ნარჩუნდება. ეს კი პროცედურისა და მისი ზემოქმედების არის მაქსიმალურ ეფექტურობას უზრუნველყოფს. მუდმივი კონტროლის წყალობით ქირურგს უფრო მოკლე დროში ბევრად დიდ არეზე ჩარევა შეუძლია.