მიომების მედიკამენტური მკურნალობა

მიომები, რომლებიც არანაირ ჩივილს არ იწვევს, მკურნალობას არ საჭიროებს. ასეთ მიომებს რეგულარულად უნდა აკვირდებოდეს თქვენი ექიმი. თუ დაკვირვების პერიოდში მიომა იზრდება, იცვლის ფორმას ან მიომასთან დაკავშირებული ჩივილები ჩნდება, მიომა უნდა ვმკურნალოთ.

უპირველესად, მკურნალობა იგეგმება იმის გათვალისწინებით, საშვილოსნოს რომელი ნაწილიდან იღებს სათავეს მიომა და რა ჩივილებს იწვევს. მიომების საბოლოო მკურნალობა მათი ოპერაციული გზით ამოკვეთაა. თუმცა ზოგიერთი მედიკამენტის გამოყენებით შესაძლებელია მიომების შემცირება ან მიომებთან დაკავშირებული ჩივილების შემსუბუქება. პირველ რიგში, ქალებს, რომელთაც მიომის გამო ძლიერი ტკივილი აქვთ, შეიძლება დაენიშნოთ ტკივილგამაყუჩებლები.

ქალებს, რომელთაც ძლიერი სისხლდენა და ტკივილი აქვთ, შეიძლება დაენიშნოთ კონტრაცეპტული აბები ან სხვა ჰორმონის შემცველი მედიკამენტები, რის შედეგადაც მათი ტკივილი სუსტდება და სისხლდენა მცირდება. ქალებს, რომელთაც ძლიერი სისხლდენა აქვთ და ამის გამო ანემია განუვითარდათ, ანემია ეწამლებათ პერორალური ან ვენური რკინის პრეპარატებით.

ზოგჯერ ეს ანემია ძალიან ღრმაა და შესაძლოა საჭირო გახდეს სისხლის გადასხმა. ჭარბი სისხლდენის მქონე ქალებში ჰორმონული მკურნალობის გარდა ეფექტურია საშვილოსნოში ჩადგმული ჰორმონული სპირალითაც მკურნალობა. თუმცა ყველა ამ მკურნალობის მიუხედავად, ბოლოს მაინც შესაძლოა საჭირო გახდეს მიომის ოპერაციული გზით ამოკვეთა. თუ მიომა უნაყოფობას იწვევს ან განმეორებით სპონტანურ აბორტებს განაპირობებს, ის პირდაპირ ქირურგიულად უნდა ამოიკვეთოს.